Князи людстии собрашася на Господа и на Христа Его.
Слово законопреступное возложиша на Мя: Господи, Господи, не остави Мене.
На вечери Твоей, Христе Боже, учеником Твоим предглаголал еси: един от вас
предаст Мя.Беззаконный же Иуда не восхоте разумети.
На тридесятих сребреницех, Господи, и на лобзании льстивном, искаху иудее убити Тя.
Беззаконный же Иуда не восхоте разумети.
Днесь Иуда оставляет Учителя и приемлет диавола, ослепляется страстию сребролюбия,
отпадает Света омраченный: како бо можаше зрети, Светило продавый на тридесятих
сребреницех? Но нам возсия Страдавый за мир. К Немуже возопиим: пострадавый и
сострадавый человеком, Господи, слава Тебе.
Днесь Кресту пригвоздиша иудее Господа, пресекшаго море жезлом и проведшаго их в
пустыню. Днесь копием ребра Его прободоша, язвами ранившаго их ради Египта: и желчию
напоиша, манну пищу им одождившаго.
Господи, на страсть вольную пришед, вопиял еси учеником Твоим: аще и единаго часа не
возмогосте бдети со Мною, како обещастеся умрети Мене ради? Поне Иуду зрите, како не
спит, но тщится предати Мя беззаконным. Востаните, молитеся, да не кто Мене отвержется,
зря Мене на Кресте. Долготерпеливе, слава Тебе.
Трищи отвергся Петр, абие реченное ему разуме, но принесе к Тебе слезы покаяния: Боже,
очисти мя и спаси мя.
Даша в снедь Мою желчь, и в жажду Мою напоиша Мя оцта: Ты же, Господи, возстави мя, и
воздам им.
Одеяйся светом, яко ризою, наг на суде стояще, и в ланиту ударение прият от рук, ихже созда:
беззаконнии же людие на Кресте пригвоздиша Господа Славы: тогда завеса церковная
раздрася, солнце померче, не терпя зрети Бога досаждаема, Егоже трепещут всяческая.
Тому поклонимся.
Ученик отвержеся, разбойник возопи: помяни мя, Господи, во Царствии Твоем.
Ниже земля яко потрясеся, ниже камение яко разседеся, евреов увещаша, ниже церковная
завеса, ниже мертвых воскресение. Но даждь им, Господи, по делом их, яко тщетным на Тя
поучишася.
Сия глаголет Господь иудеем: людие Мои, что сотворих вам? Или чим вам стужих? Слепцы
ваши просветих, прокаженныя очистих, мужа, суща на одре, возставих. Людие Мои, что
сотворих вам? И что Ми воздасте? За манну желчь: за воду оцет: за еже любити Мя, ко Кресту
Мя пригвозидисте. Ктому не терплю прочее, призову Моя языки, и тии Мя прославят со Отцем
и Духом, и Аз им дарую живот вечный.
Днесь церковная завеса на обличение беззаконных раздирается, и солнце лучи своя
скрывает, Владыку зря распинаема.
Егда предстал еси Каиафе, Боже, и предался еси Пилату, Судие, небесныя силы от страха
поколебашася. Егда же вознеслся еси на древо, посреде двою разбойнику, вменился еси с
беззаконными, Безгрешне, за еже спасти человека: Незлобиве Господи, слава Тебе.
Собрание иудейское у Пилата испросиша распяти Тя, Господи: вины бо в Тебе не обретше,
повиннаго Варавву свободиша, и Тебе, Праведнаго, осудиша, сквернаго убийства грех
наследовавше. Но даждь им, Господи, воздаяние их, яко тщетным на Тя поучишася.
Мал глас испусти разбойник на кресте, велию веру обрете во едином мгновении спасеся и
первый, райская врата отверз, вниде: Иже того покаяние восприемый, Господи, слава Тебе.
Днесь висит на древе, Иже на водах землю повесивый: венцем от терния облагается, Иже
Ангелов Царь: в ложную багряницу облачается, одеваяй небо облаки: заушение прият, Иже
во Иордане свободивый Адама: гвоздьми пригвоздися Жених Церковный: копием прободеся
Сын Девы. Покланяемся Страстем Твоим, Христе. Покланяемся Страстем Твоим, Христе.
Покланяемся Страстем Твоим, Христе. Покажи нам и славное Твое Воскресение.
Крест Твой, Господи, жизнь и заступление людом Твоим есть, и нань надеющеся, Тебе
распятаго Бога нашего поем, помилуй нас.
Из службы Последования Святых Страстей Господа нашего Иисуса Христа
Фото: Софии Никитиной.
